100-årsjubileet til Hol kyrkje skal markerast med ei storstilt jubileumshelg 4. - 6. oktober, nøyaktig 100 år sidan kyrkja vart innvigd, med konsertar, festgudsteneste og markering av jubileet.

Vi ynskjer å trekkje fram lokale musikarar og lokale musikktradisjonar til dette jubileet og ein kan mellom anna få oppleve Frøy Hovland Holtbakk, Daniel Kvammen i samspel med Skarvebarna og folkemusikkgudsteneste med fleire lokale utøvarar.

Fredag 4. oktober: Haugtussa

På denne konsertforestillinga vert eit rikt utval av Arne Garborg sine originale tekstar om Haugtussa presentert. Skodespelar Ola B Johannessen framfører teksten medan sopran Frøy Hovland Holtbakk og pianist Thormod Rønning Kvam står for tolkinga av den musikalske Haugtussa, op. 67 signert Edvard Grieg.

Medverkande: 

• Ola B. Johannessen, skuespiller
• Frøy Hovland Holtbakk, vokal
• Thormod Rønning Kvam, piano
• Tekstutvalg, regi og konsept: Ola B. Johannessen

Laurdag 5. oktober: Daniel Kvammen med Skarvebarna

Geiloartisten Daniel Kvammen har spelt konsertar på alt frå landets største festivalar til ein mykje omtala hytteturné på Hardangervidda. Han jobbar i mange ulike like format, men har alltid den same nærleiken til eit stadig vaksande publikum. Kvammen sine låtar har vist seg å vera sterke, anten dei vert framført med fullt band, som nedstrippa triovariant eller framført åleine. Til 100-årsjubileet til Hol Kyrkje får vi oppleve Daniel Kvammen i eit heilt spesielt samarbeid i lag med det lokale barnekoret Skarvebarna.

Sundag 6. oktober:Folkemusikkmesse og markering av 100-årsjubileet

100-årsjubileet vert avslutta med folkemusikkgudsteneste og påfølgande jubileumsprogram på Bygdahall. Folkemusikkgudstenesta vil i tillegg til Jo Asgeir Lie sin folkemusikkliturgi innehalde musikalske bidrag frå fleire lokale musikarar frå Hol og Hallingdal, og ha fokus på lokal musikk og lokale musikktradisjonar.
Etter gudstenesta vert det høgtideleg markering av jubileet på Bygdahall.